KouCheyThian01

CHRITA

DA-HULU-KALA

PASAL

KOU CHEY THIAN

天齋猴

MAN-GAWAL-KAN

TONG THYE CHU

子太唐

PERGI Dl NEGRI

SEH THIAN C'HU KENG

---~---

DI ZAMAN

TONG TEOW

----~----

VOLUME 1

KITAB KA-SATU

(SECOND EDITION)

---~---

HARGA-NYA SATU RINGGET

---~---

CHAN YEN P'AI

ANAK-BESAR

BATU GANTONG

SINGAPORE

--

The Copyright is reserved.

Par-mula-an

INI Chrita yang betol-nya di triak " Seh Yew " (me-nyusor di se-bla barat); meng-erti-nya: —Kou Chey Thian, Tu Ko, dan Swa Cheng men-gawal-kan Tong Thye Chu pergi di negri "Seh Thian Chu Keng ' ' (men-dapat koran Buddha di kayangan-barat).

Yang Tong Thye Chu punya nama-betol di triak Tan Hien Chong, sa sunggu-sunggu-nya dia sindiri ada parna sampai di ibu-kota Delhi (Northern India) men-dapat banyak kitab kitab " Keng " yang benar itu.

Yang Kou Chey Thian smua-nya ini, tiadak ini pasal, tiadak ini jin, ini chuma auta punya Chrita saja.

Maksud entara-dalam Chrita ini, apa yang Tong Thye Chu ber-ampat ter-jumpa empunya jin-iblis smua, itu lah sperti-nya pe-nyaket kita macham macham di dalam badan; dan apa yang Tong Thye Chu meng-harap mau dapat empunya "Toe "

(Nirvana), itu lah bagai kita sa-hari hari meng-harap hendak dapat empunya panjang-umor.

Yang orang idop di dalam dunia, dikalu

" Ada umor tiadak wang—per-chuma, ''

" Ada wang tiadak umor—tak-guna ; "

per-kata-an dari

Batu Gantong.

Singapore, 1st. January, 1911

Sun Ngo Khong (孫悟空)

INI

CHRITA

PASAL

JIN MONYET BATU-BESI

BER-NAMA

KOU CHEY THIAN.

猴齊天

---~---

ADA-PUN sa-kali-perestawa (once upon a time) satu negri ber-nama Go Lai Kok , ka-dudok-an-nya dekat satu laut-an besar; di tenga laut-an situ ada satu pulau amat lah besar, banyak buket, di triak Hwa Ko San , ka-atas kamuchak-buket situ ada sa-keping batu-besi yang besar; tinggi-nya agak agak ada tiga pulo anam kaki stenga, keliling nya ada dua pulo ampat kaki genap-genap. Ka-atas ini batu ada sembilan liyang —lapan lobang; dari mulai-pertama, apa bila buwana (the Creation, or the World) telah ter-jadi sampai sekarang, ini batu dari-pada masa-itu suda kena jemor mata-hari sajurus taun itu, men-dapat ka-sinar-an bulan sa-panjang panjang malam, sa-lama-lama ba-gitu lah ada-nya; maka dari-pada tempo buwana itu, ini sa-keping batu besi yang siang-hari men-dapat hawa-panas, yang jam-malam me-nahan embun-sejuk, telah-suda ber-kumpol meneh (meni) sampaiter-jadi bunting.

Ada kah ini pasal? Hairan! Ada-pun satu hari, enta apa hari itu, ini sa-keping batu-besi suda merka, men-jadi ter-bla—ter nga-nga, te-lah-suda ter-golek kluar datang sa-biji telor-batu, bulat-nya sperti satu bola besar, sa telah kena angin me-niop, suda di jalma-kan man-jadi sa-ekor mo.nyet batu, muka idong mata kuping kening mulot—smua-nya chukop, dengan ber-ampat tangan, mo.nyet tiad-ak kaki-sedia-kala bag'tu ada-nya; demekian-ini, ini anak-binatang sa-telah suda mulai blajar kesot blajar me-rang-kak, blajar jalan, blajar lari, blajar soja, lalu ber-soja soja—meng-adap ka-depan ampat muka bu-

mi;yang ber-dua biji-mata-nya punya trang-tajam— gilang-gemilang sa-bagai kilat; yang gilang gilang-nya telah di sinar-kan sa-jurus pergi sampai ka-tenga balai-ruwang estana Geok Hong Siang Teh 玉皇上帝 (Allah Twan Allah); Geok Hong Siang Teh pun sa-telah men-jadi hairan, tiadak tau dari-mana datang ini kachaya-an kilat-kilat; demeki-an-itu, Dia akan suro lekas ber-kumpol kan smua dewa dewa dewata, datok datok-besupwan, dan kramat kramat-peri, datang meng-adap, sambil suro C'hian Li Gan 千里眼 dan Sun Hong Ni 順風耳 , dua panglima-kramat lalu bukak pintu-kota swarga di sabla slatan pergi intai-kan; ini ber dua panglima-kramat yang ber-nama sa-kejapan-itu suda balek datang ber-kabar-kan; kata-nya, ''yang dimana itu tumpat ada gilang-gemilang, ka-betol-an dari buket Hwa Ko San lah, dekat negrl Go Lai Kok: ka-atas kam-

uchak buket situ ada sa-keping batu-besi telah ber-telor kluar sa-biji telor batu-besi, sa-telah itu bila kena angin me-niop, suda di jelma-kan men-jadi sa-ekor mo.nyet-batu; waktu-ini, iya-itu tenga ber soja

Page 3

soja ka-depan ampat muka bumi; yang ka-chaya-an ini, dari gilang-gilang sa-pasang mata-nya punya ka-trang-an-tajam-- ber-kilat kilat-itu di sinar-kan sa-jurus datang sampai di tumpat swarga sini; sekarang-ini iya-itu ada mulai blajar makan kulat-- chendawan, minum ayer tawar, bisa-tau men-jamu, yang gilang-gemilang-nya itu suda mau kabur---padam."

Geok Hong Siang Teh kata, "yang di bawa bumi sana punya barang, dari atas langgit sini punya meneh di-jadi-kan, tiadak apa hairan ada-nya."

Jadi, ini sa-kawan punya dewa-dewa sa-telah menyaot, "Besma-Allah! Wallahi! skelian-nya slamat!"

Tempo-itu, ini sa-ekor monyet di atas buket situ suda bisa-tau ber-jalan tentu, me-lari tetap, pundai m'lompat, biasa m'lonchat, buleh makan rumpot--sayor, suka minum ayer-gaong, bisa memaot lalu pata-kan pokok bunga, reti menchari akan petek-kan bua bua-utan; dia alang suka buat kawan sama lutung dan bangau, dengan rusa dan kijang men-jadi kumpol-an, malam-malam pergi tidor di tumpat-terjal (cliff), pagi-pagi datang susor dekat gwa-tebuwan, sunggu lah skali iya-itu yang tinggal di utan punya manusia di mana-tau ada apa hari-bulan; sampai musem sejuk suda lain pun, iya-

itu tiadak tau bila-kala tempo taun-baru-nya Ma-ka ada-pun satu hari, hawa mata-hari amat panas-trek, ini sa-ekor mo.nyet-batu dengan sa-kawan-nya paya me-nahan panas, mau jugak dapat sedi-kit angin spoi-spoi me-niop-kan datang; maka ini

sa-kawan punya binatang-apret smua-nya telah pergi ber-main lompat-katak—blajar tunggang-ba-lek ka-bawa lindung-an pohon-pohon tinggi-besar yang dehan dehan-nya chondong, rantang ranting -

Page 4

nya rendang; ada sa-kejap-an lagi, ini sa-kawan punya mo.nyet suda pergi mandi di dalam ayer-gaong; ini mo.nyet mo.nyet nampak ini anak-ayer meng-ilir banyak kenchang, arus-nya ter-ha.nyut pusing-putar amat dras, jadi iya-ini ber-sama skali ber-triak, kata-nya, "enta ini anak-ayer dari mana datang punya ayer; yang ini hari kita dapat sen-ang-diri akan me nurut ini sum pat me-manjat naik gaong pergi cbari mata ayer-nya, stenga ber-main main pun, paling baik jugak(ini Pulau besar punya mo.nyet mo nyet memang tau ber-chakap, hairan!); ya! jum! kita pergi lah, ma'i! lekas, selak lah!' ' Chuma sa-kali ber-saot saja, ini sakawan punya mo.nyet ber-sama sama telah m'lonchat suda naik ka-atas gaong situ pergi, me-nurut ka-tepi anak-ayer-itu trus lari sampai di tumpat mata-ayer sana, sa-betol-nya chuma satu ayer-turjun, ini sa-kawan punya mo.nyet dengan ber-tepok tepok tangan ber-triak, "bagus, bagus! banyak bagus punya ayer; mana satu ada sa-buleh-nya brani me-nyorong masok pergi sampai dapat chari-kan isi-mata-ayei-nya itu, dengan badan tiadak ber-luka, apa-bila ba-

lek kluar datang, kita akan mengaku-kan dia men-jadi raja kita."

Suda me-nanya tiga kali, ini brapa ekor punya mo.nyet nampak entara-dalam sa-kawan-nya ini ada satu yang di glar-kan mo.nyet-batu-itu telah m'lompat kluar datang me nyaot, " haku brani ma-sok, haku brani masok pergi." Chuba tengok, ini sa-ekor mo.nyet-batu chuma tutop-kan mata, telah ber-jongkok, serta tumpu masok di tenga ayer-tur-jun-itu pergi, serta bukak mata meng-angkat ker pala—tengadah, iya nampak di sebla dalam sana ada tana kring, tiadak ayer, tiadak arus, smua-nya

Page 5

trang-chaya. me-lintang ada satu jembatan papan batu-besi, ka-bawa jembatan situ ada arus me-lang-gar batu ter-panchor masok lobang, ter-ha.nyut balek lain ter-sumboh kluar pergi sekat-kan pintu-jembatan; habis, ini sa-ekor mo.nyet telah m'loni-pat naik di atas kepala-jembatan-itu serta bukak mata akan prati-kan, sa-betol-nya bagai ruma-tang-ga orang tinggal, betol lah bagus satu tumpat; suda habis intai meng-intai, ini mo.nyet m'lonchat lalu dari jembatan situ pergi preksa-kan di kiri, iya nampak betol-betol dekat situ, ka-tenga ada sa-ke-ping naisan-batu ter-diri, depan muka-nya di ukir-

kan surat surat "Hwa 花 (bunga) Ko 菓 (bua) San 山 (buket). tumpat-berkat punya Chwi 水 (ayer) Liam 鐮 (bidai) Tong 洞 (gwa)." Ini mo.nyet bukan kepalang punya suka-ati; iya lagi tutop-kan mata-nya, telah ber-jongkok, serta murta balek tumpu kluar datang, stenga naik bersin dua kali, sambil ber-kata, " untong besar, untong besar.^

Itu sa-kawan punya mo.nyet mo.nyet telah da-tang kepong-kan iya-ni keliling, sambil menanya, " apa macham ada di sebla dalam situ, ayer-nya ada brapa dalam ? ' '

Ini mo.nyet me-nyaot, "tidak ayer, tidak ayer, chuma ada satu jembatan papan batu-besi, kaliwat-an sana bagai ruma-tangga orang sediakala-ada punya.''

Lain brapa ekor mo.nyet me-nanya, "bagimana kau buleh tau bagai ruma tangga orang?''

Ini mo.nyet dengan ter-tawa, akan balas-kata, "ini ayer-turjun, dari bawa jembatan situ tersum-boh kluar datang punya ayer; di tepi jambatan ada pokok pokok bunga, pohon pohon-kayu, yang betol-

Page 6